’بے شرم رنگ‘ پر نقالی کا الزام، سجاد علی کی وضاحت سامنے آگئی
پاکستان کے نامور گلوکار سجاد علی نے سوشل میڈیا صارفین کی جانب سے بھارتی فلم ’پٹھان‘ کا گانا ’بے شرم رنگ‘ کی دھن نقل کرنے سے متعلق افواہوں اور قیاس آرئیوں کو مسترد کردیا۔
سماجی رابطے کی ویب سائٹ ٹوئٹر پر سجاد علی نے وضاحت دیتے ہوئے کہا کہ ’میں نے کب کہا کہ میرا گانا کاپی کیا گیا ہے؟ بلکہ میں نے کہا تھا کہ گانا سن کر مجھے اپنا ایک پرانا گانا یاد آگیا‘۔
Take it easy guys….. pic.twitter.com/ZdqBOoqjBX
— Sajjad Ali (@sajjad_official) January 3, 2023
انہوں نے کہا کہ میں نے اپنے پچھلی ویڈیو میں نہ کسی گلوکار کا کا نام لیا نہ گانے، میوزک ڈائریکٹر اور نہ اداکار کا نام لیا ہے۔
سجاد علی نے کہا کہ ’میں نے اپنی ویڈیو میں کہا تھا کہ گانا سن کر مجھے اپنا ایک پرانا گانا یاد آگیا، کیونکہ ہمارے ہاں 80 فیصد جو گانے بنتے ہیں جو ایک دوسرے سے ملتے جلتے ہیں، گانے کی پہلی لائن سے لوگوں نے سمجھ لیا کہ میرا گانا کاپی کرلیا گیا ہے۔‘
معروف گلوکار نے کہا کہ میں نے ایسا کوئی بیان دیا ہے اور نہ میں ایسے بیانات دیتا ہوں، میرے گانے کی نقل نہیں کی گئی اور نہ میں نے ایسا کچھ کہا ہے۔
انہوں نے کہا کہ مجھے ایسے بیانات دینے کے لیے سستی شہرت حاصل کرنے کی کوئی ضرورت نہیں ہے، جب 90 کی دہائی میں میرے گانے پورے کاپی ہورہے تھے نہ تب میں نے کبھی بات کی اور نہ آج کروں گا۔
سجاد علی کا کہنا تھا کہ کچھ لوگوں کی جانب سے کہا جارہا ہے کہ میں نے مہدی حسن کی غزل کاپی کرلی ہے، یہ غزل مہدی حسن کی نہیں بلکہ احمد فراز کی ہے، ایک غزل کو کئی لوگ کئی سو الگ الگ دھنوں میں گاتے ہیں اسے کاپی نہیں کہتے۔
انہوں نے مزید کہا کہ ہمارے ہاں فن کو کھرچ کھرچ کر ہمارے ذہنوں سے نکال دیا ہے اس لیےہمیں شوق تو بہت ہے لیکن علم نہیں ہے۔
خیال رہے کہ بھارتی اداکار شاہ رخ کی فلم ’پٹھان‘ کا گانے ’بے شرم رنگ‘ ریلیز کیے جانے کے بعد پاکستان کے نامور گلوکار سجاد علی کی جانب سے ٹوئٹ میں اپنے پرانے گانے کی دھن شیئر کیے جانے کے بعد شائقین نے بولی وڈ فلم ساز اور موسیقاروں پر دپیکا پڈوکون اور شاہ رخ خان کے گانے ’بے شرم رنگ‘ کی دھن کاپی کرنے کا الزام عائد کردیا۔
ٹوئٹ میں سجاد علی کو اپنے پرانے گانے کی دھن کو گنگناتے ہوئے دیکھا اور سنا جا سکتا ہے۔
After listening to a new movie’s song, It reminded me of my song I released 26 years ago, Ab Ke Hum Bichare. Enjoy!! pic.twitter.com/X86Jw34R8k
— Sajjad Ali (@sajjad_official) December 26, 2022
ویڈیو کو شیئر کرتے ہوئے سجاد علی نے کیپشن میں لکھا تھا کہ حال ہی میں انہوں نے نئی فلم میں آنے والے ایک گانے کو سنا تو انہیں اپنا ایک 26 سال پرانا گانا یاد آگیا۔
ان کی دھن سننے کے بعد متعدد سوشل میڈیا صارفین نے ان کی ٹوئٹ کو ری ٹوئٹ کرتے ہوئے دعویٰ کیا تھا شاہ رخ خان اور دپیکا پڈوکون کا گانا ’بے شرم رنگ‘ سجاد علی کے گانے ’اب کے ہم بچھڑے تو کتابوں میں ملیں‘ کی دھن سے کاپی کرکے تیار کیا گیا ہے۔
