ترکی: مسافر بردار طیارہ لینڈنگ کے دوران حادثے کا شکار، ایک مسافر ہلاک، کم از کم 150 زخمی

ترکی کے شہر استنبول میں دوران لینڈنگ ایک مسافر بردار طیارہ رن وے سے پھسل جانے کے باعث ایک شخص ہلاک جبکہ 150 سے زائد مسافر زخمی ہو گئے ہیں۔

اس حادثے کے باعث طیارہ تین ٹکڑوں میں تقسیم ہو گیا ہے۔

حکام کے مطابق پیگاسس ایئر لائن کی پرواز پر 171 مسافر اور عملے کے چھ ارکان سوار تھے۔ طیارہ ملک کے مغربی صوبے ازمیر سے استنبول پہنچا تھا جہاں یہ صبیحہ گوکن کے ہوائی اڈے پر حادثے کا شکار ہوا۔

ترکی کے مواصلات کے وزیر محمد چاہت تورہان نے کہا ہے بوئنگ 737 خراب لینڈنگ کے بعد اپنی رفتار پر قابو نہیں رکھ سکا تھا۔

اس واقعے کے بعد ہوائی اڈے کو عارضی طور پر بند کر دیا گیا اور تمام پروازوں کو دوسرے ہوائی اڈوں کی طرف موڑ دیا گیا ہے۔

ترکی کے ذرائع ابلاغ کے مطابق تیز بارش اور طیارے کے عقبی حصے پر ہوا کے تیز دباؤ کی وجہ سے یہ حادثہ پیش آیا۔

طیارے کے حادثے کی ویڈیوز میں دیکھا جا سکتا ہے کہ ٹکڑوں میں بٹے ہوئے طیارے سے مسافر باہر نکلنے کی کوشش کر رہے ہیں جبکہ بہت سے امدادی کارکن اس کے اردگرد کام کرتے دکھائی دے رہے ہیں۔ کچھ ویڈیوز میں جہاز کے اندر لگی آگ بھی دیکھی جا سکتی ہے لیکن اس آگ پر بہت جلد قابو پا لیا گیا۔

پیگاسز کا تباہ ہونے والا طیارہ

ترکی کے وزیر صحت فہرتن کوکا نے تصدیق کی ہے کہ ہلاک ہونے والے مسافر کا تعلق ترکی سے ہے تاہم ان کا کہنا تھا کہ اس حادثے میں زخمی ہونے والے تمام مسافروں کی حالت خطرے سے باہر ہے۔

استنبول کے گورنر علی یرلیکایا کا کہنا ہے کہ ’بدقسمتی (موسم کی خرابی کے باعث) طیارے پر پائلٹ کا کنٹرول نہ رہ سکا اور اور طیارہ رن وے سے پھسل کر 50 سے 60 میٹر دور چلا گیا۔‘

پیگاسز کا تباہ ہونے والا طیارہ

ترکی کے میڈیا کے مطابق طیارے پر سوار زیادہ تر افراد کا تعلق ترکی ہی سے ہے تاہم مسافروں میں 20 غیر ملکی بھی شامل ہیں۔

ذرائع ابلاغ کا کہنا ہے کہ اس جہاز پر دو پائلٹس تھے جن میں سے ایک کا تعلق ترکی اور دوسرے کا تعلق جنوبی کوریا سے ہے۔ دونوں پائلٹ بھی زخمی ہیں۔

ترکی کے وزیر مواصلات کا کہنا ہے کہ ابھی تک حکام کو جہاز کے پائلٹس سے بات کرنے کا موقع نہیں ملا ہے۔

اپنی رائے کا اظہار کریں

Your email address will not be published. Required fields are marked *