سارہ خان اور فلک شبیر کے ہاں بچے کی پیدائش

نامور اداکارہ سارہ خان اور گلوکار فلک شبیر کے ہاں بچے کی پیدائش ہوگئی، جوڑے کے ہاں 8 اکتوبر کو بیٹی کی پیدائش ہوئی۔

سارہ خان اور فلک شبیر جولائی 2020 میں شادی کے بندھن میں بندھے تھے اور دونوں نے رواں برس جون میں تصدیق کی تھی کہ ان کے ہاں پہلے بچے کی پیدائش متوقع ہے۔

اب گلوکار فلک شبیر نے انسٹاگرام پوسٹ کے ذریعے تصدیق کردی کہ ان کے ہاں بیٹی کی پیدائش ہوگئی۔

فلک شبیر نے انسٹاگرام پر بچی کے ہاتھ میں اپنے اور سارہ خان کے ہاتھ کی تصویر شیئر کرتے ہوئے مداحوں کو بتایا کہ وہ والد بن گئے۔

گلوکار نے مداحوں کا شکریہ ادا کرتے ہوئے بتایا کہ انہوں نے بیٹی کا نام ’عالیانہ فلک‘ رکھا ہے۔

فلک شبیر نے پوسٹ میں خدا کا شکرا ادا کرتے ہوئے ماہ ربیع الاول کے حوالے سے بھی پیغام لکھا اور اس بات پر خوشی کا اظہار کیا کہ ان کے ہاں جمعے کے مبارک دن اللہ کی رحمت کا نزول ہوا۔

ان کی جانب سے شیئر کی گئی تصویر میں بچی کا چہرہ بھی دکھائی دیتا ہے جب کہ ان کی اہلیہ سارہ خان کے ہاتھ میں ڈرپ کی کینولا کو بھی دیکھا جا سکتا ہے۔

فلک شبیر کی جانب سے اپنے ہاں بیٹی کی پیدائش سے متعلق کی گئی پوسٹ پر متعدد شوبز شخصیات نے کمنٹس کیے اور انہیں مبارک باد پیش کی جب کہ مداحوں نے بھی ان کے والد بننے پر خوشی کا اظہار کیا۔

گلوکار نے اپنی پوسٹ میں یہ نہیں بتایا کہ ان کی اہلیہ نے بچی کو کہاں جنم دیا اور اب ان کی طبیعت کیسی ہے لیکن انہوں نے دعائیں کرنے پر مداحوں کا شکریہ ادا کیا۔

اپنے ہاں بچی کی پیدائش سے کچھ دن قبل ہی فلک شبیر نے اپنے گھر میں بچے کے لیے بنائی گئی نرسری کی ویڈیو بھی سوشل میڈیا پر شیئر کی تھی اور بتایا تھا کہ وہ اور ان کی اہلیہ اپنے ہاں پہلے بچے کی متوقع آمد پر کتنا خوش ہیں۔

اس سے قبل بھی فلک شبیر اہلیہ سارہ خان کے ہمراہ ویڈیوز اور تصاویر شیئر کرتے رہے تھے اور انہیں ویڈیوز میں حاملہ اہلیہ کی خدمت کرتے ہوئے دیکھا جا سکتا تھا۔

سارہ خان کو دوران حمل بھی شوبز کے کاموں میں مصروف دیکھا گیا اور رواں برس جولائی میں انہوں نے انکشاف کیا تھا کہ حال ہی میں نشر ہونے والے اپنے ڈرامے ’لاپتا‘ کی شوٹنگ کے وقت وہ حاملہ تھیں اور انہوں نے حمل کے باوجود شوٹنگ میں حصہ لیا۔

اپنی رائے کا اظہار کریں

Your email address will not be published. Required fields are marked *

error: