پاکستان کرکٹ بورڈ نے ٹی20 ورلڈ کپ کے لیے حتمی اسکواڈ کا اعلان کردیا ہے اور اسکواڈ میں 3 تبدیلیوں کا اعلان کیا گیا ہے جس کے تحت سرفراز احمد کی ٹیم میں واپسی ہوئی ہے۔
پاکستان کرکٹ بورڈ کی جانب سے اعلان کردہ ترمیم شدہ اسکواڈ میں سرفراز احمد، فخر زمان اور حیدر علی کو شامل کیا گیا ہے۔
پاکستان کرکٹ بورڈ نے راولپنڈی میں جاری نیشنل ٹی 20 کپ میں پرفارمنس کی بنیاد پر ٹیم میں چند اہم تبدیلیاں کی ہیں۔
4 ستمبر کو اعلان کردہ اسکواڈ میں جگہ بنانے والے خوشدل شاہ، اعظم خان اور محمد حسنین ورلڈ کپ اسکواڈ میں جگہ بنانے میں ناکام رہے۔
Three changes made in Pakistan's @T20WorldCup squad! Haider Ali, Sarfaraz Ahmed and Fakhar Zaman included in the final 15.
— Pakistan Cricket (@TheRealPCB) October 8, 2021
More details: https://t.co/eZ9T7RGjfw#HarHaalMainCricket | #T20WorldCup pic.twitter.com/A9Z4MGsmE8
پاکستان کرکٹ بورڈ سے جاری اعلامیے کے مطابق صہیب مقصود کو اسکواڈ میں برقرار رکھنے کا فیصلہ میڈیکل پینل سے مشورے کے بعد کیا گیا اور اب وہ بہتر محسوس کررہے ہیں۔
اس سے قبل 6 اکتوبر کو نیشنل ٹی20 کپ میں ناردرن اور سدرن پنجاب کے درمیان میچ میں صہیب کی کمر میں تکلیف ہوئی تھی جس کی وجہ سے وہ سینٹرل پنجاب کے خلاف میچ بھی نہیں کھیل سکے تھے۔
اس کے بعد ان کا ایم آر آئی اسکین کیا گیا تھا جس میں رپورٹ درست آنے کے بعد ان کی اسکواڈ میں شمولیت کا فیصلہ برقرار رکھا گیا۔
چیف سلیکٹر محمد وسیم نے کہا کہ نیشنل ٹی20 کپ میں کھلاڑیوں کی کارکردگی کا جائزہ اور ٹیم مینجمنٹ سے مشاورت کے بعد ہم نے ٹی20 ورلڈ کپ کے لیے اسکواڈ میں حیدر علی، فخر زمان اور سرفراز احمد کی شمولیت کا فیصلہ کیا ہے۔
Chief Selector @MuhammadWasim77 talks about the changes in the Pakistan @T20WorldCup squad.
— Pakistan Cricket (@TheRealPCB) October 8, 2021
More details: https://t.co/7m089fxLdi#HarHaalMainCricket | #T20WorldCup pic.twitter.com/QNOKBGoRoe
انہوں نے کہا کہ تینوں ان فارم کھلاڑی اسکواڈ میں تجربے اور ٹیلنٹ کا حسین امتزاج لے کر آئیں گے اور ٹیم کی مضبوطی کا باعث بنیں گے۔
چیف سلیکٹر نے کہا کہ یہ فیصلہ اعظم، خوشدل اور حسنین کے لیے آسان نہیں ہو گا لیکن ان کے پاس اپنے کیریئر میں بہترین کارکردگی کے مزید مواقع بھی آئیں گے۔
انہوں نے کہا کہ نیشنل ٹی20 کپ میں بہترین اعلیٰ معیاری کھیل پر میں بہت خوش ہوں، اس نے نہ صرف ٹی20 ورلڈ کپ کے لیے ہمیں بہترین پریکٹس فراہم کی بلکہ ہمیں کھلاڑیوں کی کارکردگی کا جائزہ لے کر ٹیم کے حق میں بہتر فیصلہ کرنے کا بھی موقع ملا۔
یاد رہے کہ ورلڈ کپ کے لیے ریزرو کھلاڑیوں کی فہرست میں بھی معمولی تبدیلی کی گئی ہے اور شاہنواز دھانی اور عثمان قادر کے ساتھ اب خوشدل شاہ ریزرو کھلاڑیوں کی فہرست کا حصہ ہیں۔
اس سے قبل فخر زمان ریزرو کی فہرست میں تھے لیکن اب فخر زمان کی حتمی اسکواڈ میں شمولیت کے سبب خوشدل کو ریزرو میں شامل کر لیا گیا ہے۔
ٹی20 ورلڈ کپ میں پاکستانی ٹیم اپنا پہلا میچ 24 اکتوبر کو روایتی حریف بھارت کے خلاف کھیلے گی جبکہ دوسرا میچ 26 اکتوبر کو نیوزی لینڈ سے ہو گا۔
ایونٹ کے تیسرے میچ میں قومی ٹیم 29 اکتوبر کو افغانستان کے مدمقابل ہو گی جس کے بعد 2 اور 7 نومبر کو کوالیفائر ٹیموں سے میچ ہوں گے۔