کترینہ کیف اور وکی کوشل کی شادی کے لیے راجستھان کا 700 سال پرانا قلعہ مکمل طور پر بُک

گذشتہ کئی دنوں سے بالی وڈ اداکار وکی کوشل اور اداکارہ کترینہ کیف کی شادی کی خبریں ذرائع ابلاغ میں گردش کر رہی ہیں۔

دونوں نے اب تک ان خبروں کی تصدیق نہیں کی ہے تاہم راجستھان میں حکام شادی کے موقع پر امن و امان کو برقرار رکھنے کے لیے انتظامات کر رہے ہیں۔

جمعے کو شہر سوائی مادھوپور میں ضلعی مجسٹریٹ راجندر کشن کی سربراہی میں ایک میٹنگ بلائی گئی تھی تاکہ اس شادی سے متعلق انتظامات طے کیے جا سکیں۔ اس میں ویڈنگ پلینر، ہوٹل مالکان اور پولیس حکام شامل تھے۔

راجندر کشن نے بی بی سی کو بتایا کہ ’مقامی انتظامیہ سے ملاقات کی گئی ہے۔ چوتھ کا برورا میں صفائی اور امن و امان کی ہدایات دی گئی ہیں۔ کوئی (بُرا) واقعہ نہیں ہوگا اور ٹریفک روانی میں رہے گی۔‘ اس میٹنگ میں پبلک ٹرانسپورٹ کے بارے میں بھی بات کی گئی۔

ان کا کہنا ہے کہ شادی کی تقریبات سات سے 10 دستمبر تک ہوں گی اور اس میں 120 مہمان شرکت کریں گے۔ اس دوران کورونا وائرس کی روک تھام کے انتظامات بھی کیے جائیں گے۔

راجندر کشن نے بتایا کہ ’کووڈ گائیڈلائنز پر عملدرآمد کی ہدایات دی گئی ہیں۔ مہمانوں کے لیے لازم ہوگا کہ انھیں ویکسین کی دونوں خوراکیں لگی ہوں۔ ہوٹل کی انتظامیہ ہیلپ ڈیسک لگائے گی۔ مہمانوں کو یہ ہدایت دی جا چکی ہیں۔‘

کترینہ کیف، وکی کوشل، راجستھان

ان کے مطابق مہمانوں کے لیے ویکسین کی دونوں خوراکیں اور کورونا کے پی سی آر ٹیسٹ لازم ہوں گے۔ ویکسین کے بغیر مہمانوں کو آنے کی اجازت نہیں ہوگی۔

سوائی مادھوپور میں ایڈیشنل ڈسٹرکٹ کلیلٹر ڈاکٹر سورج سنگھ نے خط میں لکھا ہے کہ ’وکی کوشل اور کترینہ کیف کی شادی کی تقریب کے انتظامات سے قبل شائقین پر قابو، امن و امان، ممکنہ واقعات اور ضروری انتظامات کرنے کی ضرورت ہے۔‘

سوائی مادھوپور میں انتظامات

راجستھان کے شہر سوائی مادھوپور سے قریب 18 کلو میٹر دور ایک پہاڑی چوٹی پر چوتھ کا برورا کے مقام پر ایک 700 سال پرانا قلعہ واقع ہے جسے اب ایک ہوٹل میں تبدیل کر دیا گیا ہے۔ اس کا نام سکس سینسز فورٹ ہوٹل ہے۔

اگرچہ وکی یا کترینہ کی جانب سے اب تک اپنی شادی کا اعلان نہیں کیا گیا مگر مہمان چار دسمبر سے ہی آنا شروع ہو جائیں گے۔

شادی کی تقریبات کے لیے ہوٹل کے کمرے چار سے 12 دسمبر تک بُک کیے گئے ہیں۔

ذرائع ابلاغ کی خبروں کے مطابق کترینہ اور وکی کوشل چھ دسمبر کو سوائی مادھوپور آئیں گے۔

ہوٹل کی انتظامیہ سے رابطہ کیے جانے پر انھوں نے ہمیں اس شادی کے بارے میں کچھ نہیں بتایا۔ پھر جب ہم نے اس قلعے میں چھ سے آٹھ دسمبر کے لیے کمرہ بُک کرنا چاہا تو انتظامیہ نے انکار کر دیا اور کہا کہ سات سے 12 دسمبر تک بکنگ نہیں ہو سکتی۔

کترینہ کیف، وکی کوشل، راجستھان

ایک مقامی صحافی کے مطابق مہمانوں کے علاوہ ڈرائیورز اور سکیورٹی حکام سمیت دیگر عملے کے لیے قریبی ہوٹلوں میں بکنگ کروائی گئی ہے۔

راجستھان میں اس سے پہلے بھی معروف شخصیات کی شادیاں ہوئی ہیں۔ کئی بڑی کاروباری شخصیات اور بالی وڈ کے ستاروں نے جھیلوں کے شہر اودے پور میں شادی کی ہے۔ مگر سوائی مادھوپور میں یہ اپنی نوعیت کی پہلی شادی ہوگی۔

چوتھ کا برورا فورٹ کو حال ہی میں ایک ہوٹل میں تبدیل کیا گیا ہے اور اب یہاں وکی کوشل اور کترینہ کیف اپنی شادی رچانے جا رہے ہیں۔

رواں سال اکتوبر میں اس کے افتتاح پر بالی وڈ اداکارہ ملائکہ اروڑا بھی آئی تھیں۔

خیال ہے کہ کترینہ اور وکی کے مینیجرز کی ٹیمیں بھی ہوٹل میں شادی کے انتظامات میں مصروف ہیں۔

ایک مقامی صحافی کے مطابق اس قلعے میں 48 کمرے ہیں اور ایک کمرے کا کرایہ 50 ہزار سے سات لاکھ کے درمیان ہے۔

کترینہ اور وکی کوشل کے لیے الگ الگ سویٹ بُک کیے گئے ہیں جن کا ایک رات کا کرایہ سات لاکھ روپے ہے۔

کترینہ کیف، وکی کوشل، راجستھان

ایک مقامی صحافی نے ہوٹل کے ذرائع کا حوالہ دیتے ہوئے کہا ہے کہ شادی کی تقریبات سات دسمبر کو سنگیت سے شروع ہوں گی جبکہ شادی کی سب سے اہم تقریب نو دسمبر کو ہوگی۔ آٹھ دسمبر کو مہندی کی رسم نبھائی جائے گی جس کے لیے دنیا کی مشہور سوجات مہندی منگوائی گئی ہے۔

سوجات کمپنی کے ایک اہلکار نے بی بی سی کو بتایا کہ جے پور سے ایک ایونٹ کمپنی کی کال آئی تھی۔ انھوں نے کترینہ کیف کی شادی کے لیے مہندی کی بات کی تھی تاہم انھوں نے مزید تفصیلات دینے سے انکار کیا۔

شادی کے مہمانوں کی کوئی فہرست جاری نہیں کی گئی مگر خیال ہے کہ بالی وڈ، کاروبار اور سیاست کی دنیا سے کچھ معروف لوگ شرکت کریں گے۔

پولیس اہلکار راجیش سنگھ کے مطابق ’ہمیں مہمانوں کی فہرست نہیں دی گئی نہ ہی ہم نے ان سے لسٹ مانگی ہے۔ راستے پر ضروری انتظامات کیے جائیں گے۔‘

میڈیا کی خبروں کے مطابق مہمانوں سے گزارش کی گئی ہے کہ اس بارے میں کوئی تفصیلات نہ دیں۔

error: