Site icon Dunya Pakistan

یوم خواتین کے موقع پر ایک نظم

صدیوں سے چل رہا ہے یہ کاروانِ نسواں
لکھ دی ہے نقشِ پا نے ہر داستانِ نسواں

اونچائیوں پہ پرچم ماضی میں بھی رہا ہے
دنیا میں آج بھی ہے اونچا نشانِ نسواں

دھرتی پہ بھی چلے تو ہر گام امتحاں ہے
اونچی اڑان میں بھی ہے امتحانِ نسواں

میداں ہے زندگی کا اپنے بغیر سونا
آباد اپنے دم سے ہے یہ جہانِ نسواں

صحرا ئوں میں بھی جائے بسنے کے واسطے گر
بن جاتا ہے بیاباں اک گلستانِ نسواں

ممتا کا ایک بادل ہے دھوپ سے بچاتا
آنچل کو ماں کے کہئے ہاں سائبانِ نسواں

ہم نے بدل دئے ہیں معنی ولا غزل کے
اشعار بن گئے ہیں اب تو زبانِ نسواں

Exit mobile version