اداکارہ و میزبان میرا سیٹھی نے کہا ہے کہ حال ہی میں وہ اداکار فیروز خان کی سابق اہلیہ علیزے سلطان اور ان کے اہل خانہ سے ملیں، جنہوں نے اداکار پر سنگین الزامات لگائے۔
میرا سیٹھی نے اپنی ٹوئٹ میں بتایا کہ جب انہوں نے علیزے سلطان کے والد سے ملاقات کی تو ان کے والد نے افسردہ انداز میں ان سے پوچھا اور بتایا کہ فیروز خان نے جیم میں جاکر باڈی بنائی، کس لیے؟ ان کی بیٹی کو مارنے کے لیے؟
میرا سیٹھی نے اپنی مختصر ٹوئٹ میں مزید بتایا کہ علیزے سلطان کے والدین نے فیروز خان پر سنگین الزامات عائد کیے، جن سے متعق ہمیں سنجیدہ ہونے کی ضرورت ہے۔
میرا سیٹھی نے 27 اکتوبر کو کی گئی ٹوئٹ میں بتایا کہ انہوں نے علیزے سلطان اور ان کے اہل خانہ سے ملاقات کی لیکن انہوں نے یہ واضح نہیں کیا کہ انہوں نے فیروز خان پر کس طرح کے سنگین الزامات عائد کیے۔
I met Aliza Sultan and her family.
— Mira Sethi (@sethimirajee) October 27, 2022
The allegations are very serious, and people should take them seriously.
Her father: “Mujhe iss baat ki hairat hai ke uss ne itni body banaai gym mein. Laikin kis leye? Meri beti ko maarne ke leye?”
میرا سیٹھی سے قبل بھی متعدد شوبز شخصیات نے فیروز خان پر سخت تنقید کرتے ہوئے ان پر پابندی کا مطالبہ کیا تھا جب کہ اقرا عزیز نے تو ان کے ساتھ منصوبوں میں کام کرنے سے الگ ہونے کا اعلان بھی کیا تھا۔
فیروز خان پر شوبز شخصیات اس وقت برہم ہوئیں جب کہ ان کی سابق اہلیہ علیزے سلطان کی جانب سے کراچی کی مقامی عدالت میں خود پر تشدد کے شواہد عدالت میں پیش کیے اور ان کی جانب سے عدالت میں جمع کروائی گئی تشدد کی تصاویر سوشل میڈیا پر وائرل ہوئیں۔
فیروز خان اور علیزے سلطان کے درمیان مقامی عدالت میں بچوں کی حوالگی کا کیس زیر سماعت ہے، جس میں اداکار کی سابق اہلیہ نے اپنے اوپر کیے گئے تشدد کے شواہد بھی جمع کروائے تھے۔
دونوں نے گزشتہ ماہ 21 ستمبر کو تصدیق کی تھی کہ ان کے درمیان ستمبر کے شروع میں طلاق ہوگئی تھی۔
علیزے سلطان نے طلاق کی تصدیق کرتے ہوئے فیروز خان پر گھریلو تشدد کے الزامات بھی عائد کیے تھے۔
شوبز شخصیات کی جانب سے تنقید کیے جانے کے بعد فیروز خان نے اپنے وضاحتی بیان میں خود پر لگے الزامات کو جھوٹا قرار دیتے ہوئے ان سب افراد کے خلاف کارروائی کا عندیہ دیا تھا، جنہوں نے ان کے اوپر الزامات لگائے۔
فیروز خان اور علیزے سلطان نے 2018 میں شادی کی تھی اور ان کے ہاں 2019 میں بیٹے جب کہ 2022 کے آغاز میں بیٹی کی پیدائش ہوئی تھی اور شادی کے چار سال بعد ان کی طلاق ہوگئی۔