صارفین کی بڑی تعداد کو سست انٹرنیٹ سروس کا سامنا

November 3, 2022November 3, 2022 ایڈمن ڈیسک

بین الاقوامی سب مرین کیبل میں خرابی کے باعث کراچی کے سیکڑوں صارفین کو انٹرنیٹ سروس میں سست روی سامنا کرنا پڑا۔

رپورٹ کے مطابق لندن میں قائم انٹرنیٹ تک رسائی کی نگرانی کرنے والا گروپ ’نیٹ بلاکس‘ نے بھی انٹرنیٹ سروس میں سست روی کی تصدیق کی ہے، نیٹ بلاکس کا کہنا تھا کہ انٹرنیٹ کی بندش کی وجہ سے پاکستان کے متعدد صارفین کو سست انٹرنیٹ سروس کا سامنا کرنا پڑرہا ہے۔

نیٹ بلاکس نے نیٹ ورک آپریٹر پاکستان میں انٹرنیٹ کی بندش کی وجہ متعدد بین الاقوامی کیبل میں خرابی کو قرار دیا تاہم انٹرنیٹ سروس کو جزوی طور پر بحال کردیا گیا ہے۔

ℹ️ Confirmed: An internet outage has impacted service on several providers in #Pakistan with a partial restoration now observed; network operators attribute the disruption to multiple international cable cuts ? pic.twitter.com/BTz0LpKFfg
— NetBlocks (@netblocks) November 2, 2022

اس سے قبل پاکستان کے متعدد شہروں میں میٹا کے زیر انتظام سوشل نیٹ ورکنگ سائٹ فیس بک، واٹس ایپ اور انسٹاگرام کی سروس بھی متاثر ہوئی تھی۔

آؤٹیج ٹریکر ڈاؤن ڈیٹیکٹر کی رپورٹ کے مطابق شام 5 بجے کے بعد سوشل نیٹ ورکنگ سائٹ سروس میں خرابی پیدا ہوئی جس کے بعد سیکڑوں صارفین نے سوشل میڈیا سائٹ تک رسائی نہ ہونے کی شکایات کی تھی۔

رپورٹ میں مزید بتایا گیا کہ انسٹاگرام ، فیس بک اور میسنجر کے مجموعی طور 11 ہزار صارفین نے سوشل میڈیا سائٹ تک رسائی میں مشکل، پیغامات بھیجنے میں خلل یا اکاؤنٹ تک رسائی نہ ہونے کی شکایات رپورٹ کی تھیں۔

تاہم ڈاؤں ڈیٹیکٹر نے صارفین کی شکایات کو اکٹھا کر کے سوشل میڈیا سائٹ کی بندش کی وجہ معلوم کی۔

اس کے علاوہ 25 اکتوبر کو بھی پوری دنیا کے صارفین کو اسی طرح کی بندش کا سامنا کرنا پڑا تھا جس کے صرف دو دن بعد دنیا بھر کے صارفین کو انسٹاگرام کی بندش کا سامنا کرنا پڑا لیکن چند گھنٹوں بعد اسے بحال کردیا گیا تھا۔

2 نومبر کو کئی صارفین نے ٹوئٹر اکاؤنٹ تک رسائی میں مشکلات کا سامنا کرنے کی شکایت کی جبکہ کچھ دیر بعد متعدد صارفین نے واٹس ایپ پر پیغامات بھیجنے اور وصول کرنے کی بھی شکایات کیں۔

سوشل میڈیا سائٹ کی بندش کے بعد متعدد صارفین نے مزاحیہ پوسٹ بھی کی تھیں، ایک صارف نے لکھا کہ میٹا کے چیف ایگزیکٹو آفیسر مارک زکر برگ انٹرنیٹ بندش کو بحال کرنے کے لیے تاروں کے درمیان الجھ کر رہ گئے ہیں اور یہ جاننے کی کوشش کررہے ہیں کہ کون سی تار کہاں لگانی ہے۔