پاک-انگلینڈ ٹیسٹ سیریز: آئی سی سی نے راولپنڈی ٹیسٹ کی وکٹ کو ’غیرمعیاری‘ قرار دے دیا

انٹرنیشنل کرکٹ کونسل(آئی سی سی) نے پاکستان اور انگلینڈ کے درمیان راولپنڈی میں کھیلے گئے پہلے ٹیسٹ میچ کی وکٹ کو غیرمعیاری قرار دے دیا ہے۔

آئی سی سی کی جانب سے پاکستان اور انگلینڈ کے درمیان پہلے ٹیسٹ میچ کی پچ کو اوسط سے کم قرار دینے کے بعد راولپنڈی کرکٹ اسٹیڈیم کو ایک ڈیمیرٹ پوائنٹ دیا گیا۔

پاکستان اور انگلینڈ کے درمیان تاریخی سیریز کے پہلے ٹسیٹ کی پہلی اننگز میں انگلینڈ نے 657 آل آؤٹ بنائے اور دوسری اننگز 7 وکٹوں کے نقصان پر 264 رنز بنا کر ڈکلیئر کردی تھی اور میچ 74 رنز سے جیت لیا تھا۔

راولپنڈی ٹیسٹ میں پاکستان نے پہلی اننگز میں 579 رنز بنائے جب کہ دوسری اننگز میں وہ 268 رنز بنا کر آؤٹ ہو گئی تھی۔

گورننگ باڈی ایلیٹ پینل آف میچ ریفریز کے اینڈی پائکرافٹ کا کہنا تھا کہ یہ ایک بہت ہی فلیٹ پچ تھی جس نے کسی بھی قسم کے باؤلر کو تقریباً کوئی مدد نہیں دی۔

انہوں نے کہا کہ یہی وہ بنیادی وجہ تھی جس کی وجہ سے بلے بازوں نے بہت تیزی سے رنز بنائے اور دونوں ٹیموں نے بہت بڑا اسکور پوسٹ کیا۔

ان کا کہنا تھا کہ میچ کے دوران پچ بہت کم خراب ہوئی، اس میں گیند بازوں کے لیے کوئی مدد نہیں تھیی، میں نے آئی سی سی گائیڈ لائز کے مطابق پچ کو ’اوسط سے کم‘درجہ پایا۔

گزشتہ دنوں پاکستان کرکٹ بورڈ کے چیئرمین رمیز راجا نے بھی پچ کو شرمناک قرار دیتے ہوئے کہا تھا کہ یہ کرکٹ کے لیے اچھا سائن نہیں ہے۔

انٹرنیشنل کرکٹ کونسل کی جانب سے مارچ میں پاکستان اور آسٹریلیا کے درمیان راولپنڈی میں کھیلے گئے پہلے ٹیسٹ میچ کی وکٹ کو بھی غیرمعیاری قرار دیا تھا اور میچ ریفری نے میدان کو ایک ڈی میرٹ پوائنٹ دیا تھا۔

پاکستان نے پہلی اننگز امام الحق اور اظہر علی کی سنچریوں کی بدولت 476 رنز چار کھلاڑی آؤٹ پر ڈکلیئر کردی تھی جس کے جواب میں آسٹریلیا نے بھی پہلی اننگز میں 459رنز بنائے تھے۔

پاکستانی اوپنرز نے دوسری اننگز میں مہمان باؤلرز کو تختہ مشق بناتے ہوئے بغیر کسی نقصان کے 252 رنز بنائے تھے اور میچ ڈرا ہو گیا تھا۔

اگر کسی کرکٹ گراؤنڈ 5 ڈی میرٹ پوائنٹس دیے جاتے ہیں تو اسے ایک سال کے لیے میچ کی میزبانی کے لیے معطل کیا جا سکتا ہے، اسی طرح سے اگر اسے 10 ڈی میرٹ پوائنٹس دیے جاتے ہیں تو اسے دو سال کے لیے معطل کیا جا سکتا ہے۔