سام سنگ کا ‘کم قیمت’ 2 ان ون لیپ ٹاپ متعارف

سام سنگ نے اپنا نیا اور ‘کم قیمت’ 2 ان ون لیپ ٹاپ گلیکسی بک فلیکس الفا متعارف کرادیا ہے۔

پتلا اور ہلکے وزن کا 13.3 انچ اسکرین والا یہ لیپ ٹاپ کیو ایل ای ڈی ڈسپلے سے لیس ہے جو 2020 کی پہلی ششماہی کے دوران صارفین کو دستیاب ہوگا۔

یہ لیپ ٹاپ لاس ویگاس میں 7 جنوری سے شیڈول کنزیومر الیکٹرونکس شو کے آغاز سے قبل متعارف کرائے گئے ہیں اور ان کو اس ٹیکنالوجی نمائش میں رکھا جائے گا۔

کمپنی کے مطابق بہتر پاور سیونگز کے ساتھ آﺅٹ ڈور موڈ بھی دیا گیا ہے اور اس میں کمپنی کے فلیگ شپ لیپ ٹاپس والی ٹیکنالوجی ہی دی گئی ہے جو برائٹنس کی پیمائش اور فل ایچ ڈی پر کام کرنے میں مدد دیتی ہے۔

اس کا وزن 1.19 کلوگرام ہے جبکہ اس میں فنگرپرنٹ سنسر کی بورڈ میں دیا گیا ہے تاکہ صارفین کو لاگ ان میں آسانی فراہم کی جاسکے۔

اس کے علاوہ 2 یو ایس بی 3.0 جیک، ایک یو ایس بی سی ساکٹ، ایک ایچ ڈی ایم آئی سلاٹ اور مائیکرو ایس ڈی کارڈ ریڈر دیا گیا ہے اور ہاں ہیڈفون جیک بھی موجود ہے۔

لیپ ٹاپ میں انٹیل 10 جنریشن کور پراسیسر، 8 سے 12 جی بی ریم، 256 سے 512 جی بی اسٹوریج کے آپشن دیئے گئے ہیں جبکہ سنگل چارج پر بیٹری 17 گھنٹے سے زائد کام کرسکے گی، کم از کم کمپنی کا یہی دعویٰ ہے جبکہ یو ایس بی سی فاسٹ چارجنگ سپورٹ سے اسے جلد چارج بھی کیا جاسکتا ہے۔

اس لیپ ٹاپ میں وائی فائی سکس سپورٹ بھی دی گئی ہے اور اسٹیریو اسپیکرز دیئے گئے ہیں۔

سام سنگ کی جانب سے فلیگ شپ لیپ ٹاپس گلیکسی بک آئیون اور فلیکس کی قیمت یا دستیابی کی واضح تاریخ کا اعلان نہیں کیا گیا مگر اس کا کہنا ہے کہ گلیکسی بک فلیکس الفا فلیگ شپ لیپ ٹاپس سے سستا ہوگا اور اس کی قیمت 830 ڈالرز ہوگی۔