ڈیجیٹل مردم شماری کا آغاز: چند روز میں 40 لاکھ افراد نے پورٹل استعمال کیا
آبادی اور گھروں کی ساتویں ڈیجیٹل مردم شماری کے عمل میں گزشتہ چند روز کے دوران پاکستان شماریات بیورو کے پورٹل پر 40 لاکھ لوگوں نے کلک کیا۔
رپورٹ کے مطابق اگرچہ فیلڈ میں مردم شماری یکم مارچ سے شروع ہوگی، 20 فروری کو لانچ کیے گئے پورٹل کے ذریعے خود کو شمار کرانے کا آپشن 3 مارچ تک قابل استعمال رہے گا۔
خود شماری کا آغاز ہوا چاھتا ہے-
— Tariq Malik ™ (@ReplyTariq) February 20, 2023
آئیے ہم سب حصہ لیں, اور ڈیجیٹل مردم شماری 2023 میں شمار ہوں:https://t.co/KnhTXnXILq
خود شماری کیسے؟ جانیے ??@PBSofficialpak @NadraPak pic.twitter.com/2UoqRd3Jrv
پاکستان شماریات بیورو کے رکن سرور گوندل نے ایک نیوز کانفرنس میں بتایا کہ پورٹل پر لوگوں کی جانب سے صرف چند روز میں سامنے آنے والا رد عمل ’بہت زبردست‘ رہا، انہوں نے مزید کہا کہ جنوبی ایشیا میں یہ اپنی نوعیت کی پہلی ڈیجیٹل مردم شماری ہے۔
تاہم انہوں نے اعتراف کیا کہ اس دوران کچھ معمولی مسائل بھی رپورٹ ہوئے جن سے قومی ڈیٹابیس اور رجسٹریشن اتھارٹی (نادرا) کو آگاہ کردیا گیا ہے، نادرا ڈیجیٹل مردم شماری کے لیے استعمال ٹیکنالوجی کی دیکھ بھال کر رہا ہے۔
سندھ خاص طور پر کراچی، بلوچستان اور کچھ دیگر علاقوں سے اس عمل پر اٹھائے جانے والے خدشات سے متعلق سوالات کا جواب دیتے ہوئے سرور گوندل نے کہا کہ مردم شماری کے بڑے اور اہم کام سے قبل ڈیجیٹل مردم شماری کی وضاحت کے لیے خاص طور پر صوبائی اسٹیک ہولڈرز کے ساتھ طویل مشاورت کی گئی۔
ڈیجیٹل مردم شماری سے متعلق جن خدشات کو اٹھایا جارہا ہے ان کی وجہ مردم شماری کے طریقہ کار کی سمجھ بوجھ کی کمی ہے۔
سوالات کے جواب دیتے ہوئے سرور گوندل نے ان اقدامات کی تفصیلات بھی شیئر کیں کہ کس طرح ڈیٹا کی حفاظت اور تحفظ کو یقینی بنایا گیا ہے۔
انہوں نے کہا کہ تربیت یافتہ ایک لاکھ عہدیدار مردم شماری سے متعلق معلومات کے اندراج اور اسٹرکچر کو جیو ٹیگ کرنے کے لیے ٹیبلیٹ کا استعمال کریں گے۔
