آئی سی سی کے اعلیٰ حکام کو پاکستان کرکٹ ’نئی بلندیوں‘ تک پہنچنے کی امید

انٹرنیشنل کرکٹ کونسل (آئی سی سی) کے چیئرمین گریگ بارکلے نے ’بہترین سہولیات‘ اور عالمی کرکٹ کی میزبانی کی صلاحیت کا حوالہ دیتے ہوئے پاکستان کرکٹ کی ’نئی بلندیوں‘ تک پہنچنے کی امید کا اظہار کیا۔

گریگ بارکلے اور آئی سی سی کے چیف ایگزیکٹو جیف ایلارڈائس ان دنوں پی سی بی کی عبوری مینجمنٹ کمیٹی کے چیئرمین نجم سیٹھی اور دیگر اعلیٰ حکام سے ملاقاتوں کے لیے پاکستان کے 2 روزہ دورے پر موجود ہیں۔

ICC Chairman Greg Barclay and Chief Executive Geoff Allardice meet Chair of the PCB Management Committee Mr Najam Sethi and board officials at Gaddafi Stadium, Lahore. pic.twitter.com/5I2BHKdNoW

— Pakistan Cricket (@TheRealPCB) May 30, 2023

ڈان کے مطابق نجم سیٹھی نے گزشتہ ماہ دبئی میں انٹرنیشنل کرکٹ گورننگ باڈی کے اجلاس کے موقع پر آئی سی سی کے اعلیٰ حکام کو ملک کا دورہ کرنے کی دعوت دی تھی۔

گریگ بارکلے اور جیف ایلارڈائس نے اپنے دو روزہ دورے کے دوران قومی کرکٹ اکیڈمی، لاہور قلعہ، لاہور میوزیم، مینار پاکستان اور سیف سٹی پروجیکٹ کا بھی دورہ کیا۔

ICC Chairman Greg Barclay and Chief Executive Geoff Allardice were presented with special PCB souvenirs and toured historical sites on the first day of their visit to Lahore. pic.twitter.com/2yLY1KQiKP

— Pakistan Cricket (@TheRealPCB) May 30, 2023

پاکستان کرکٹ بورڈ کے ٹوئٹر پیج پر شیئر کی گئی ایک ویڈیو میں گریگ بارکلے نے کہا کہ انہیں پاکستان آکر بہت خوشی ہوئی ہے۔

انہوں نے کہا کہ ان کی سوچ یہ ہے کہ آئی سی سی کے تمام رکن ممالک کا دورہ کیا جائے اور دیکھا جائے کہ ہر رکن ملک میں کرکٹ اور اس کے انتظامی معاملات اس کے دائرہ اختیار کے تحت کس طرح چلائے جارہے ہیں کیونکہ ہر ملک اپنے سائز، معیشت اور کرکٹ کی درجہ بندی کے اعتبار سے دوسرے سے مختلف ہے۔

گریگ بارکلے نے پاکستان میں کرکٹ کی سہولتوں کی تعریف کرتے ہوئے کہا کہ یہ سہولتیں اور کرکٹ سے متعلق پروگرام بہت زبردست ہیں، اب چونکہ پاکستان میں انٹرنیشنل کرکٹ واپس آچکی ہے لہٰذا پاکستان کرکٹ بورڈ دوطرفہ کرکٹ کے انتظامات کے سلسلے میں کامیابی کے ساتھ اپنا کردار ادا کر رہا ہے۔

انہوں نے امید ظاہر کرتے ہوئے کہا کہ ہم پاکستان کی مرد اور خواتین کرکٹ کو اگلے درجے پر دیکھیں گے اور کمرشل نقطہ نظر سے بھی اس کے مثبت اثرات نظر آئیں گے۔

گریگ بارکلے نے کہا کہ انہیں مرد اور خواتین کرکٹ کی ترقی اور انتظامی سطح پر اس کی منصوبہ بندی سے متعلق جو بریفنگ دی گئی اس سے وہ بہت خوش ہوئے ہیں اور وہ سمجھتے ہیں کہ عالمی سطح پر مقابلوں میں شرکت اور کامیابیوں کے تناظر میں صلاحیت کے اعتبار سے پاکستان کی خواتین کرکٹ کا مستقبل بہت اچھا ہوگا۔

گریگ بارکلے کا کہنا ہے کہ انہوں نے پاکستان کے دورے میں جو کچھ دیکھا ہے اس سے وہ بے حد متاثر ہوئے ہیں، جیسا کہ آئی سی سی کے نقطہ نظر سے ہم اس کھیل کو دنیا بھر میں وسعت دینا چاہتے ہیں اس میں پاکستان کرکٹ بورڈ کی موجودگی خوشی کا باعث ہے۔

Chair of the International Cricket Council, Mr Greg Barclay reviews his two-day visit to Lahore alongside Mr Geoff Allardice, the ICC Chief Executive.

Read more: https://t.co/WzF37dluCt pic.twitter.com/OHuMWTvon1

— Pakistan Cricket (@TheRealPCB) June 1, 2023

پاکستان کرکٹ بورڈ کی مینجمنٹ کمیٹی کے سربراہ اور آئی سی سی کے ڈائریکٹر نجم سیٹھی کا کہنا تھا کہ وہ اس دورے کے لیے گریگ بارکلے اور جیف ایلارڈائس کے شکر گزار ہیں۔

اس دورے نے آئی سی سی اور پاکستان کرکٹ بورڈ کو اپنے خیالات اور آئیڈیاز کے تبادلے کا موقع فراہم کیا۔

انہوں نے کہا کہ پاکستان کرکٹ بورڈ، آئی سی سی کے ساتھ بات چیت کو جاری رکھنے اور گلوبل حکمت عملیوں اور منصوبوں کے معاملے میں ساتھ کام کرنے پر یقین رکھتا ہے کیونکہ یہ نہ صرف تمام رکن ممالک کے بہترین مفاد میں ہیں بلکہ ان سے اس مشترکہ مقصد کو حاصل کرنے میں بھی مدد ملے گی جس کا مقصد کرکٹ کو مزید فروغ دیتے ہوئے نئے دیکھنے والوں کو اپنی جانب متوجہ کرنا ہے۔