2021 میں عمدہ کارکردگی، وزڈن نے رضوان کو سال کا بہترین ٹی20 کرکٹر قرار دے دیا

وزڈن نے قومی ٹیم کے وکٹ کیپر بلے باز محمد رضوان کو عمدہ کارکردگی پر وزڈن الماناک کے 2022 کے ایڈیشن کے لیے سال کا بہترین کھلاڑی قرار دیا ہے۔

رضوان کے لیے 2021 کا سال انتہائی یادگار رہا اور وہ ٹی20 کرکٹ میں ایک سال کے دوران 2 ہزار سے زائد رنز بنانے والے دنیا کے پہلے کھلاڑی بن گئے۔

انہوں نے 45 اننگز میں 56.55 کی اوسط سے 2 ہزار 65 رنز بنائے۔‎

اس کے علاوہ رضوان ٹی20 انٹرنیشنل کرکٹ میں ایک سال کے دوران ایک ہزار سے زائد رنز بنانے والے بھی دنیا کے پہلے کرکٹر بن گئے، انہوں نے 73.66 کی اوسط سے ایک ہزار 326 رنز اسکور کیے۔

Before 2021, Mohammad Rizwan had scored 313 T20I runs in 26 matches.

In 2021 alone, he scored a staggering 1,326 runs at an average of 73.66, with one century and 12 half-centuries.

A stunning 12 months for Wisden's Leading T20 Cricketer in the World 🔥#WisdenAwards pic.twitter.com/P1nH4KufS7

— Wisden (@WisdenCricket) April 20, 2022

محمد رضوان نے گزشتہ سال نیوزی لینڈ کے خلاف نصف سنچری کے بعد جنوبی افریقہ کے خلاف سنچری بناکر 2021 کا یادگار انداز میں آغاز کیا تھا۔

پاکستان سپر لیگ (پی ایس ایل) میں بھی عمدہ کارکردگی کا سلسلہ جاری رکھا اور اپنی ٹیم کو 2021 میں لیگ کا چیمپیئن بنوانے میں بھی مرکزی کردار ادا کیا۔

اس کے بعد زمبابوے اور جوبی افریقہ کے دوروں میں بھی ان کا بہترین کھیل جاری رہا جہاں انہوں نے نصف سنچریاں اسکور کی۔

ٹی20 ورلڈ کپ میں بھی رضوان نے کپتان بابر کے ساتھ مل کر پاکستان بیٹنگ لائن کا بوجھ سنبھالا اور بھارت کے خلاف میچ میں شاندار نصف سنچری کی بدولت اپنی ٹیم کو 10 وکٹوں کی یادگار فتح سے ہمکنار کرایا۔

صرف یہی نہیں بلکہ رضوان نے طبیعت انتہائی خراب ہونے کے باوجود بھی آسٹریلیا کے خلاف سیمی فائنل میچ میں بہترین باری کھیلی اور نصف سنچری اسکور کی تھی۔