مصری فٹبالر محمد صلاح کے مداح صرف انسان ہی نہیں، طوطے بھی ان کے گن گانے لگے

برطانوی فٹبال کلب لیور پول کے مداح تو مصری کھلاڑی محمد صلاح کے گیت گاتے ہی ہیں لیکن اب ان کے پرستاروں میں ایک ایسا طوطا بھی شامل ہو گیا ہے جو ’محمد صلاح، محمد صلاح‘ کا گیت گنگناتا ہے۔

یہ ایک افریقن سرمئی رنگ کا طوطا ہے جس کا نام ’کیلو‘ ہے۔

اس طوطے کی مالکن لنڈا بتاتی ہیں کہ وہ ان کے پاس تب سے ہے جب اس کی عمر محض 13 ہفتے تھی۔

رواں سال اکتوبر میں کیلو پانچ سال کا ہو جائے گا۔

لنڈا خود لیور پول کی فین ہیں ان کا کہنا ہے کہ کیلو نے ’مو صلاح‘ گانا کہیں سنا اور تب سے اسے گنگنانا شروع کر دیا۔

وہ کہتی ہیں ’اب تو اسے گانے کے سارے الفاظ رٹ گئے ہیں۔‘

محمد صلاح کا کہنا ہے کہ مداحوں نے ویسے تو ان کے لیے بہت سے گانے بنائے ہیں لیکن ان سب میں ان کا پسندیدہ گانا وہ ہے جس میں انھیں ’ایجیپشن کنگ (مصری بادشاہ)‘ پکارا جاتا ہے۔

چیمپیئنز لیگ میں لیورپول کے لیے سب سے زیادہ گولز کرنے والوں کی فہرست میں محمد صلاح کا 16 گولز کے ساتھ دوسرا نمبر ہے۔ لیور پول کے لیجنڈ فٹبالر سٹیون جیرارڈ اس فہرست 30 گولز کے ساتھ پہلے نمبر پر ہیں۔ ٹائمز میگزین نے اس سال انھیں 100 بااثر افراد کی فہرست میں بھی شامل کیا ہے۔

محمد صلاح نے حال ہی میں لیور پول کو چیمپیئنز لیگ کا فائنل جتوانے میں اہم کردار ادا کیا تھا۔ شاید اسی وجہ سے اس بار عید کے موقع پر مصر میں ان کے آبائی علاقے نیگرگ میں ان گھر کے باہر کافی مجمع اکھٹا ہو گیا۔

صلاح کو اپنی ذاتی زندگی میں صحافیوں اور مداحوں کی یہ مداخلت کچھ پسند نہیں آئی۔ ان کا کہنا تھا کہ وہ عید کی نماز تک پڑھنے نہیں جا سکے۔

عربی میں کی گئی اپنی ٹویٹ میں ان کا کہنا تھا ’اس کا پسندیدگی سے کوئی تعلق نہیں۔ یہ احترام اور پیشہ وارانہ مہارت کی کمی ہے۔‘

صلاح سنیچر کو یورپ کا سب سے بڑا فٹ بال ٹائٹل یو ای ایف اے کپ جیتنے کے بعد قاہرہ پہنچے تھے۔ اب وہ 21 جون سے شروع ہونے والے افریقہ کپ آف نیشنز میں حصہ لیں گے جس کی میزبانی مصر کر رہا ہے۔

گذشتہ سال موسمِ گرما میں ورلڈ کپ کے بعد ان کے گھر کا پتہ لیک ہو گیا تھا اور تب بھی ہزاروں افراد ان کے گھر کے باہر جمع ہو گئے تھے۔

لیکن اس وقت صلاح باہر جا کر اپنے مداحوں سے ملے اور آٹوگراف دینے کے علاوہ ان کے ساتھ سلفیاں بھی بنوائیں۔

میگی

محمد صلاح اپنی بیوی میگی صلاح اور بیٹی مکہ کو اپنی کامیابی کی بڑی وجہ سمجھتے ہیں۔

میگی سے صلاح کی پہلی ملاقات مصر میں سکول کے دنوں میں ہوئی تھی۔

سنہ 2013 میں رشتہ ازدواج میں منسلک ہونے کے بعد سے دونوں ساتھ ہیں اور میگی میچوں کے دوران سٹینڈز سے صلاح کا حوصلہ بڑھاتی آئی ہیں۔

لیکن سنہ 2018 میں جب صلاح نے پریمیئر لیگ کے میچ میں گولڈن بوٹ جیتا، تب پہلی مرتبہ میگی اور مکہ نے انھیں فیلڈ میں جوائن کیا اور اس طرح وہ سب کی توجہ کا مرکز بن گئیں۔

میچ کے اختتام پر پچ پر مدعو کر کے جب انھیں گولڈن بوٹ کا ایوارڈ دیا گیا تو ان کی بیٹی مکہ صلاح فٹبال کے ساتھ کھیلتی کھیلتی میدان میں آ گئیں جس پر شائقین نے انھیں بھر پور داد دی۔

مکہ

صلاح اپنے مداحوں کو وقتاً فوقتًا سوشل میڈیا کے ذریعے اپنی ذاتی زندگی کی جھلک بھی دکھاتے رہتے ہیں۔

انسٹاگرام پر ان کے تقریباً 28 ملین سے زیادہ فالورز ہیں۔

لیور پول کے مسلمانوں کے لیے فخر کی علامت

لیور پول کے مسلمان محمد صلاح کو فخر کی علامت سمجھتے ہیں۔

سٹینفورڈ یونیورسٹی کی ایک تحقیق کے مطابق لیور پول فٹ بال کلب میں صلاح کی موجودگی اور ان کی بڑھتی ہوئی مقبولیت شہر میں خوشگوار اثرات لانے کا باعث بنی ہے اور اسلاموفوبیا کو کم کرنے میں مدد دی ہے۔

شہر بھر میں اور سوشل میڈیا پر مسلمان مخالف جذبات اور نفرت انگیز جرائم میں نمایاں کمی دیکھی گئی ہے۔

اپنی رائے کا اظہار کریں

Your email address will not be published. Required fields are marked *