نسیم شاہ انجری کے سبب ایک ہفتے کیلئے پی ایس ایل سے باہر
پاکستان سپر لیگ(پی ایس ایل) کے پانچویں ایڈیشن میں دفاعی چیمپیئن کوئٹہ گلیڈی ایٹرز کی مشکلات میں اضافہ ہوتا جا رہا ہے اور ٹیم مسلسل شکستوں کے بعد اب ایک ہفتے کے لیے نسیم شاہ کی خدمات سے محروم ہو چکی ہے۔
کوئٹہ گلیڈی ایٹرز کے فاسٹ باؤلر گزشتہ روز پشاور زلمی کے خلاف میچ میں انجری کا شکار ہوئے تھے اور اسی سبب اپنے کوٹے کے اوورز بھی مکمل نہیں کر سکے تھے۔
نسیم شاہ پشاور زلمی کے خلاف میچ میں ٹخنے کی انجری کا شکار ہوئے تھے اور اسی سبب فیلڈ سے باہر چلے گئے تھے۔
فرنچائز کے فزیو تھراپسٹ نثار خان نے نسیم شاہ کو ایک ہفتے آرام کا مشورہ دیا ہے اور ان کی بیماری کے حوالے سے تفصیلات پاکستان کرکٹ بورڈ کے میڈیکل پینل کو بھیج دی گئی ہیں۔
ابھی تک کوئٹہ گلیڈی ایٹرز نے نسیم شاہ کے متبادل کا فیصلہ نہیں کیا اور اس بارے میں کوئی بھی فیصلہ کیے جانے کی صورت میں اعلان کردیا جائے گا۔
یاد رہے کہ پی ایس ایل 2020 میں دفاعی چیمپیئن کوئٹہ گلیڈی ایٹرز کی ٹیم مشکلات سے دوچار ہے اور انہیں مسلسل شکستوں کے سبب ان کے پلے آف میں پہنچنے کے بھی لالے پڑ گئے ہیں۔
لیگ کے آغاز سے قبل ہی مڈل آرڈر بلے باز عمر اکمل پر پابندی کے بعد اہم کھلاڑیوں غیرملکی اور مقامی کھلاڑیوں کی ناقص فارم کے سبب گلیڈی ایٹرز کو چند میچوں میں شکستوں کا منہ دیکھنا پڑا۔
اب فاسٹ باؤلر نسیم شاہ کی انجری کے بعد فرنچائز کی مشکلات میں مزید اضافہ ہو گیا جہاں ٹیم کو پلے آف مرحلے تک رسائی کے لیے اپنے اگلے تینوں میچوں میں کامیابی درکار ہے۔
