کورونا وبا: پنجاب میں ایک روز میں ریکارڈ 82 اموات، ملک میں متاثرین ایک لاکھ 71 ہزار سے زائد
پاکستان میں کورونا وائرس کے کیسز اور اس سے ہونے والی اموات ہر گزرتے دن کے ساتھ بڑھ رہی ہے اور آج بھی ملک میں مزید کیسز اور اموات کے بعد مجموعی متاثرین ایک لاکھ 71 ہزار 666 ہوگئے جبکہ انتقال کرنے والوں کی تعداد 3 ہزار 382 تک پہنچ گئی۔
آج (20 جون) کی صبح تک ملک میں 2 ہزار 938 نئے کیسز اور 87 اموات کا اضافہ ہوا جبکہ صحتیاب ہونے والوں کی تعداد بھی بڑھ گئی۔
واضح رہے کہ ملک میں رواں ہفتے سے اموات کی تعداد میں اچانک تیزی سے اضافہ ہوا ہے اور یومیہ 100 سے زائد اموات رپورٹ کی جارہی ہیں۔
اگرچہ ملک میں اس وائرس کے پھیلاؤ کو روکنے کے لیے مختلف علاقوں میں اسمارٹ لاک ڈاؤن کی حکمت عملی کو اپنایا گیا ہے، تاہم اس کے باوجود ملک میں کیسز اور اموات کی تعداد میں اضافہ دیکھا جارہا ہے۔
اس وقت ملک میں سب سے زیادہ متاثر شہر کراچی ہے جہاں کیسز کی تعداد 50 ہزار سے زائد ہوچکی ہے جبکہ شہر میں اموات بھی 875 سے زیادہ ہیں۔
علاوہ ازیں اگر ملک کی مجموعی صورتحال اور اب تک کے اعداد و شمار پر نظر ڈالیں تو ڈان نیوز ڈاٹ ٹی وی کے مرتب کردہ ڈیٹا کے مطابق ملک میں کورونا وائرس کا پہلا کیس 26 فروری جبکہ موت 18 مارچ کو رپورٹ ہوئی۔
پاکستان میں پہلے کیس سے لے کر 31 مارچ تک تقریباً 2 ہزار کیسز اور 26 اموات سامنے آئیں جو اپریل کے مہینے میں بڑھ کر 385 ہوگئیں جبکہ کیسز ساڑھے 16 ہزار سے بڑھ گئے۔
مئی کے مہینے میں صورتحال کافی تبدیل ہوئی اور ملک میں کیسز کی تعداد بڑھ کر 71 ہزار سے تجاوز کرگئی جبکہ اموات بھی 1500 سے زائد ہوگئیں۔
تاہم جون میں صورتحال بالکل ہی مختلف نظر آرہی ہے اور 19 روز میں تقریباً ایک لاکھ نئے کیسز اور 1700 سے زائد اموات کا اضافہ دیکھا گیا ہے۔
آج (20 جون) کو بھی ملک میں نئے کیسز اور اموات کی تصدیق ہوئی۔
پنجاب
صوبہ پنجاب میں کورونا وائرس کے مزید 2538 نئے کیسز اور ایک روز میں اب تک کی سب سے زیادہ 82 اموات ریکارڈ کی گئیں۔
سرکاری سطح پر اعداد و شمار و دیگر معلومات کی فراہمی کے لیے قائم ڈیش بورڈ کے مطابق صوبے میں گزشتہ 25 گھنٹوں میں 2 ہزار 538 لوگ متاثر ہوئے جس کے بعد تعداد 64 ہزار 216 ہوگئی۔
اسی طرح صوبے میں ایک روز میں اب تک کی سب سے زیادہ 82 اموات رپورٹ ہوئیں، جس کے بعد یہ تعداد 1265 سے بڑھ کر 1347 تک پہنچ گئی۔
اسلام آباد
دوسری جانب اسلام آباد میں بھی کورونا وائرس کے مزید 338 نئے کیسز رپورٹ ہوئے۔
سرکاری اعداد و شمار کے مطابق وفاقی دارالحکومت میں گزشتہ 24 گھنٹوں کے دوران 338 نئے مریضوں کے سامنے آنے کے بعد متاثرین کی مجموعی تعداد 9 ہزر 941 سے بڑھ کر 10 ہزار 279 ہوگئی۔
گلگت بلتستان
ادھر گلگت بلتستان میں بھی کورونا کے وار جاری ہیں جہاں مزید 28 افراد اس وائرس کا شکار ہوگئے ہیں جبکہ 3 افراد لقمہ اجل بن گئے۔
ڈیش بورڈ کے مطابق گزشتہ 24 گھنٹوں میں گلگت بلتستان میں ان نئے مریضوں کی تشخیص ہوئی اور مجموعی کیسز کی تعداد 1225 سے بڑھ کر 1253 ہوگئی۔
اس کے علاوہ گلگت بلتستان میں مزید 3 اموات کا اضافہ بھی ہوا جس سے یہ تعداد 18 سے بڑھ کر 21 تک پہنچ گئی۔
آزاد کشمیر
علاوہ ازیں آزاد کشمیر میں کورونا وبا نے مزید 34 افراد کو متاثر کیا جبکہ 2 فرد جان کی بازی ہار گئے۔
سرکاری اعداد و شمار کے مطابق گزشتہ 24 گھنٹوں میں ان نئے مریضوں کے سامنے آنے کے بعد یہ تعداد 769 سے بڑھ کر 803 ہوگئی۔
مزید یہ کہ 2 فرد کورونا وائرس سے انتقال کرگئے، یوں اب تک وہاں اموات کی تعداد 15 سے بڑھ کر 17 ہوگئی۔
صحتیاب افراد
تاہم ملک میں کورونا وائرس کی تشویشناک صورتحال کے باوجود صحتیاب افراد کی تعداد دیگر مریضوں کے لیے حوصلہ افزا ہے۔
گزشتہ 24 گھنٹوں کے دوران ملک میں مزید 2 ہزار 121 افراد ایسے تھے جو مکمل شفایاب ہوگئے، جس کے بعد اب تک مجموعی طور پر صحتیاب ہونے والوں کی تعداد 61 ہزار 383 سے بڑھ کر 63 ہزار 504 ہوگئی۔
مجموعی صورتحال
ملک میں عالمی وبا کے کیسز، اموات اور صحتیاب افراد کی تعداد میں اضافے کے بعد اگر مجموعی صورتحال پر نظر ڈالیں تو وہ کچھ اس طرح ہے:
مصدقہ کیسز: 171666
اموات: 3382
صحتیاب: 63504
فعال کیسز: 104780
ملک میں اس وائرس سے سب سے زیادہ متاثر صوبے سندھ اور پنجاب ہیں، صوبہ سندھ میں کیسز 65 ہزار 163 ہیں تو وہیں پنجاب میں 64 ہزار 216 تک کیسز پہنچ چکے ہیں۔
صوبہ خیبرپختونخوا میں کورونا وائرس سے 20 ہزار 790 افراد متاثر ہوچکے ہیں جبکہ صوبہ بلوچستان میں وبا میں مبتلا ہونے والوں کی تعداد 9 ہزار 162 ہے۔
علاوہ ازیں وفاقی دارالحکومت اسلام آباد میں 10 ہزار 279، گلگت بلتستان میں 1253 اور آزاد کشمیر 803 افراد عالمی وبا کا شکار ہوچکے ہیں۔
ملک میں اموات کی صورتحال کچھ یوں ہے:
پنجاب: 1374
سندھ: 1013
خیبرپختونخوا: 789
بلوچستان: 100
اسلام آباد: 95
گلگت بلتستان: 21
آزاد کشمیر: 17
