ایلون مسک نے ٹوئٹر کا کنٹرول سنبھال لیا
مائیکرو بلاگنگ ویب سائٹ ٹوئٹر کو رواں برس اپریل میں 44 ارب ڈالر میں خریداری کا معاہدہ کرنے کے بعد خریداری سے مکر جانے والے دنیا کے امیر ترین شخص ایلون مسک نے ٹوئٹر کا کنٹرول سنبھال لیا۔
خبر رساں ادارے ’ایسوسی ایٹڈ پریس‘ (اے پی) کے مطابق ٹوئٹر سے منسلک رہنے والے متعدد ذرائع نے تصدیق کی کہ ایلون مسک نے 27 اور 28 اکتوبر کی درمیانی شب مائیکرو بلاگنگ ویب سائٹ کا کنٹرول سنبھالا۔
رپورٹ میں بتایا گیا کہ ایلون مسک کی جانب سے ٹوئٹر کا کنٹرول سنبھالے جانے کے فوری بعد انہوں نے اس کے چیف ایگزیکٹو افسر(سی ای او) بھارتی نژاد پراگ اگروال، اعلی قانونی اور پالیسی ایگزیکٹو وجیہ گڈے، چیف فائنانشل افسر (سی ایف او) نیڈ سیگال اور جنرل کونسلر سیان ایڈجیٹ کو فارغ کردیا۔
رپورٹ کے مطابق ٹوئٹر سے منسلک ذرائع کے مطابق فوری طور پر یہ واضح نہیں ہوسکا کہ ایلون مسک اور ٹوئٹر کے درمیان خریداری کا معاہدہ اب مکمل طور پر ختم ہوچکا یا ابھی اس میں تبدیلیاں ہوں گی، تاہم ایلون مسک نے ٹوئٹر کا انتظام سنبھال لیا۔
Entering Twitter HQ – let that sink in! pic.twitter.com/D68z4K2wq7
— Elon Musk (@elonmusk) October 26, 2022
ایلون مسک نے بھی اپنی ٹوئٹس میں بتایا کہ وہ ٹوئٹر کے ہیڈکوارٹر میں داخل ہوگئے اور انہوں نے عمارت میں داخل ہونے کی ویڈیو بھی شیئر کی۔
بعد ازاں انہوں نے مختصر ٹوئٹ کی کہ’پرندہ آزاد ہوگیا‘ ان کا اشارہ ٹوئٹر کے پرندے والے لوگو کی جانب تھا۔
ایلون مسک نے ایک اور ٹوئٹ میں اشتہارات دینے والی کمپنیوں اور اداروں کے لیے بھی ایک پوسٹ شیئر کی، جس میں انہوں نے ان کے ساتھ کام جاری رکھنے کا عزم ظاہر کیا۔
Dear Twitter Advertisers pic.twitter.com/GMwHmInPAS
— Elon Musk (@elonmusk) October 27, 2022
ٹوئٹر نے جولائی 2022 میں ایلون مسک کے خلاف مقدمہ دائر کرتے ہوئے عدالت سے استدعا کی تھی کہ انہیں پابند بنایا جائے کہ وہ پلیٹ فارم کو اعلان کردہ قیمت 44 ارب ڈالر میں خریدے۔
ایلون مسک نے ابتدائی طور پر اپریل 2022 میں ٹوئٹر کے فی شیئر کو 54 ڈالر سے زائد کی رقم میں خریدتے ہوئے اس کی بولی 44 ارب ڈالر لگائی تھی مگر بعد ازاں وہ ٹوئٹر پر جعلی اکاؤنٹس سمیت دیگر معاملات کو سبب بنا کر خریداری کے معاہدے سے مکر گئے تھے۔
ان کی جانب سے مکر جانے کے بعد ٹوئٹر نے ان کے خلاف مقدمہ دائر کیا تھا اور عدالت نے اعلان کیا تھا کہ ان کا ٹرائل اکتوبر کے آخر میں شروع کیا جائے گا اور ساتھ ہی عدالت نے دونوں پارٹیوں کو ٹرائل سے قبل ہی صلح کی تجویز دی تھی۔
اب عدالت میں ٹرائل شروع ہونے سے قبل ہی ایلون مسک نے ٹوئٹر کا کنٹرول سنبھال لیا، تاہم یہ واضح نہیں ہوسکا کہ ان کے اور ٹوئٹر کے درمیان ہونے والا معاہدہ مکمل ہوگیا یا نہیں؟
Elon Musk enters Twitter HQ pic.twitter.com/nGgNVkSOXK
— Chandra R. Srikanth (@chandrarsrikant) October 28, 2022
