پاکستانی ٹیم فٹنس مسائل کا شکار، ایک اور باؤلر آسٹریلیا کے خلاف سیریز سے باہر
ٹیسٹ سیریز کے دوران آسٹریلیا کے خلاف پاکستان کرکٹ ٹیم فٹنس مسائل کا شکار ہے، فاسٹ باؤلر خرم شہزاد کے بعد نعمان علی بھی ٹیم سے باہر ہوگئے۔
پاکستان کرکٹ بورڈ کی جانب سے جاری پریس ریلیز کے مطابق فاسٹ باؤلر نعمان علی شدید اپینڈیکس کے باعث آسٹریلیا کے خلاف ٹیسٹ سیریز سے باہر ہو گئے ہیں۔
نعمان علی نے گزشتہ روز اچانک اور شدید پیٹ میں درد کی شکایت کی تھی، جس کے نتیجے میں ان کا ایمرجنسی میں معائنہ اور اسکین کیا گیا جس میں اپینڈیکس کی تشخیص ہوئی۔
میلبرن میں سرجن کے مشورے پر ان کی آج صبح لیپروسکوپک اپینڈیکٹومی کروائی گئی، سرجری کے بعد ان کی طبعیت اب بہتر ہے انہیں آج دوپہر کو ڈسچارج کر دیا جائے گا۔
Noman Ali ruled out of the Test series against Australia
— PCB Media (@TheRealPCBMedia) December 23, 2023
Read more ⤵️ https://t.co/yVRyLIaIYk
یاد رہے کہ اس سے قبل فاسٹ باؤلر خرم شہزاد پسلی کے فریکچر کے باعث آسٹریلیا میں ہونے والی بقیہ ٹیسٹ سیریز سے باہر ہو گئے تھے۔
پاکستان ٹیم کے دیگر کھلاڑیوں کو پہلے ہی فٹنس مسائل کا سامنا ہے، جن میں فاسٹ باولر نسیم شاہ اور حارث رؤف شامل ہیں، جبکہ لیگ اسپنر ابرار احمد بھی دائیں ٹانگ میں تکلیف کے باعث پہلا ٹیسٹ نہیں کھیل سکے تھے۔
ہیڈ کوچ محمد حفیظ کے مطابق ابرار احمد کی جگہ لیفٹ آرم اسپنر نعمان علی کو شامل کیا گیا تھا جو انگلی میں چوٹ کا شکار ہیں، ساجد خان کو بیک اپ کے طور پر لایا گیا اب امکان ہے کہ وہ دوسرے ٹیسٹ میں نعمان علی کی جگہ لیں گے۔
