امریکا: ورجینیا کے سپر اسٹور میں فائرنگ سے مسلح شخص سمیت متعدد افراد ہلاک

پولیس نے کہا ہے کہ امریکی ریاست ورجینیا کے چیسپیک میں واقع وال مارٹ سپر اسٹور میں ایک بندوق بردار شخص نے فائرنگ کرکے 10 کے قریب افراد کو ہلاک اور متعدد کو زخمی کردیا، فائرنگ کرنے والا واحد ملزم بھی ہلاک ہوگیا۔

غیر ملکی خبر رساں اداروں کی رپورٹ کے مطابق چیسپیک شہر میں فائرنگ کا یہ واقعہ امریکا میں ’تھینکس گیونگ ڈے‘ منانے کی چھٹی سے قبل پیش آیا ہے جب کہ اس سے قبل ہفتے کے آخر میں کولوراڈو کے ایک ایل جی بی ٹی کیو کلب میں ایک اور فائرنگ کے واقعے میں 5 افراد ہلاک ہو گئے تھے۔

چیسپیک پولیس ڈپارٹمنٹ کے افسر نے جائے وقوع پر صحافیوں کو بتایا کہ فائرنگ کے فوری بعد جائے وقوع پر پہنچ کر رسپانس افسران اور ٹیکٹیکل ٹیمیں اسٹور میں داخل ہوئیں، ہم نے وہاں کئی ہلاک افراد اور متعدد زخمی شہریوں کو پایا۔

پولیس افسر نے کہا کہ ہمیں یقین ہے کہ حملہ آور ایک ہی تھا اور وہ فائرنگ کرنے والا بھی ہلاک ہوگیا ہے، انہوں نے یہ واضح نہیں کیا کہ مشتبہ شوٹر کی موت کیسے ہوئی۔

فائرنگ کے واقعے کے بعد پہلی ہنگامی کال منگل کی رات 10 بجے کے بعد کی گئی تھی جبکہ اسٹور اس وقت تک کھلا تھا۔

خبروں میں چلنے والی فوٹیج میں جائے وقوع پر پولیس کی بڑی تعداد دیکھی گئی، میڈیا رپورٹس کے مطابق کئی افسران اور تفتیش کار اسٹور کا جائزہ لے رہے تھے جب علاقے کو سیل کیا جارہا تھا جب کہ ہلاکتوں کی صحیح تعداد واضح نہیں تھی۔

پولیس افسر نے صحافیوں کو بتایا کہ پولیس سمجھتی ہے کہ فائرنگ کے اس واقعے میں 10 سے کم افراد ہلاک ہوئے۔

امریکا کی سب سے بڑی ریٹیل اسٹور چین وال مارٹ نے اپنے بیان میں کہا کہ ہم اس المناک واقعے پر صدمے میں ہیں، متاثرہ افراد، کمیونٹی اور اپنے ساتھیوں کے لیے دعاگو ہیں۔

We are shocked at this tragic event at our Chesapeake, Virginia store. We’re praying for those impacted, the community and our associates. We’re working closely with law enforcement, and we are focused on supporting our associates.

— Walmart Inc. (@WalmartInc) November 23, 2022

امریکی دارالحکومت واشنگٹن سے تعلق رکھنے والی خاتون سینیٹر نے حملے کو بے حس تشدد قرار دیتے ہوئے کہا کہ وہ دل شکستہ ہیں، اس وقت تک آرام سے نہیں بیٹھیں گے جب تک کہ ہم اپنے ملک میں بندوق کے تشدد کی اس وبا کو ختم کرنے کا حل تلاش نہیں کر لیتے جس نے بہت سی جانیں لے لی ہیں۔

I am absolutely heartbroken that America’s latest mass shooting took place in a Walmart in my district in Chesapeake, Virginia tonight. I will not rest until we find the solutions to end this gun violence epidemic in our country that has taken so many lives.

— L. Louise Lucas (@SenLouiseLucas) November 23, 2022

ورجینیا سے تعلق رکھنے والے امریکی کانگریس مین بوبی اسکاٹ نے ٹوئٹ کیا کہ افسوسناک بات یہ ہے کہ ہماری کمیونٹی تھینکس گیونگ ڈے پر ایک اور بے وقوفانہ فائرنگ کے واقعے کا شکار ہوئی۔

Tragically, our community is suffering from yet another incident of senseless gun violence just as families are gathering for Thanksgiving. My thoughts are with the victims and their loved ones. https://t.co/4zQ4YFuPbb

— Rep. Bobby Scott (@BobbyScott) November 23, 2022

گن وائلنس آرکائیو ویب سائٹ کے مطابق امریکا میں بندوق استعمال کرکے کیے جانے والے تشدد میں خطرناک حد تک اضافہ ہوگیا ہے جہاں 2022 میں اب تک 600 سے زیادہ فائرنگ کے بڑے واقعات ہو چکے ہیں۔