ایلون مسک کا ٹوئٹر سے ڈیڑھ ارب اکاؤنٹس ڈیلیٹ کرنے کا اعلان
ٹوئٹر کے نئے مالک ایلون مسک نے اعلان کیا ہے کہ ان کا پلیٹ فارم جلد ہی ان اکاؤنٹس کو ڈیلیٹ کرنا شروع کردے گا جو کئی سال سے ڈی ایکٹو ہیں۔
خیال کیا جاتا ہے کہ ٹوئٹر پر بہت سارے اکاؤنٹس ڈی ایکٹو ہیں، جنہیں کئی سال سے کوئی بھی استعمال نہیں کر رہا اور لوگوں نے یوزر نیم حاصل کرنے کی غرض سے کئی سال قبل ہی اکاؤنٹ بنا دیے تھے۔
علاوہ ازیں ٹوئٹر جعلی اور کمپیوٹرائزڈ اکاؤنٹس کی بھی کثیر تعداد سے متعلق باتیں سننے کو ملتی ہیں، تاہم کمپنی ان جعلی اکاؤنٹس کو ڈیلیٹ نہیں کرے گی جو ایکٹو ہیں۔
Twitter will soon start freeing the name space of 1.5 billion accounts
— Elon Musk (@elonmusk) December 9, 2022
ایلون مسک نے اپنی ٹوئٹ میں بتایا کہ جلد ہی ٹوئٹر ان ڈیڑھ ارب اکاؤنٹس کو ڈیلیٹ کرنا شروع کردے گا، جنہیں کئی سال سے کوئی استعمال نہیں کر رہا۔
انہوں نے ایک اور وضاحتی ٹوئٹ میں بتایا کہ ان اکاؤنٹس کو ڈیلیٹ کیا جائے گا، جو کئی سال سے ڈی ایکٹو ہیں اور ان اکاؤنٹس سے کافی عرصے سے کوئی ٹوئٹ نہیں کی گئی۔
ایلون مسک نے اپنی ایک اور ٹوئٹ میں بتایا کہ ٹوئٹر ایک ایسا سافٹ ویئر بھی تیار کرنے میں مصروف ہے، جس کے ذریعے ہر صارف کو معلوم ہوجائے گا کہ کون سا ٹوئٹر اکاؤنٹ کس وجہ سے معطل یا بلاک کیا گیا۔
انہوں نے بتایا کہ مذکورہ سافٹ ویئر کے ذریعے بلاک یا معطل ہونے والے اکاؤنٹس ہولڈرز کو یہ ہدایات بھی دی جائیں گی کہ وہ کس طرح اپنے اکاؤنٹ کو بحال کروا سکتے ہیں۔
Twitter is working on a software update that will show your true account status, so you know clearly if you’ve been shadowbanned, the reason why and how to appeal
— Elon Musk (@elonmusk) December 9, 2022
یاد رہے کہ ایلون مسک نے گزشتہ ماہ 28 اکتوبر کو ٹوئٹر کا کنٹرول سنبھالنے کے بعد پلیٹ فارم پر متعدد تبدیلیاں لانے کے اعلان کیے تھے۔
ایلون مسک نے یہ اعلان بھی کیا تھا کہ اب تمام ویریفائڈ اکاؤنٹس ہولڈرز کو بلیو ٹک کو برقرار رکھنے کے لیے ماہانہ 8 ڈالر کی فیس ادا کرنی ہوگی۔
بعد ازاں ٹوئٹر بلیو نامی فیچر کے تحت ماہانہ 8 ڈالر فیس کے تحت عام صارفین کو بھی بلیو ٹک دینے کا آغاز کیا گیا تھا مگر چند دن میں ہی درجنوں جعلی اکاؤنٹس نے فیس کے عوض بلیو ٹک حاصل کرلیا تھا، جس کے بعد مذکورہ سروس کو 12 نومبر کو معطل کردیا گیا تھا۔
خیال کیا جا رہا تھا کہ مذکورہ فیچر کو نومبر کے اختتام تک دوبارہ پیش کیا جائے گا مگر بعد ازاں ایلون مسک نے اسے کچھ عرصے تک موخر کرنے کی تصدیق کی تھی اور اب خیال کیا جا رہا ہے کہ دسمبر کے اختتام تک سبسکرپشن کے عمل کا دوبارہ آغاز کیا جائے گا۔
