’آپ میرے لیے چاچا نہیں، بوم بوم ہیں‘ شاندار اننگز کھیلنے پر شاہد آفریدی افتخار کے معترف
قومی کرکٹ ٹیم کے سابق کپتان شاہد آفریدی نے نیوزی لینڈ کے خلاف تیسرے ٹی 20 میچ میں جارحانہ اننگز سے پاکستان کو جیت کے قریب لانے والے افتخار احمد کی تعریف کرتے ہوئے کہا ہے کہ افتخار آپ میرے لیے چاچا نہیں، بلکہ بوم بوم ہیں۔
پانچ ٹی 20 میچز کی سیریز کے تیسرے میچ میں نیوزی لینڈ نے پاکستان کو سنسی خیز مقابلے کے بعد 4 رنز سے شکست دے دی تھی، شائقین کی جانب سے ’چاچا‘ کے لقب سے پکارے جانے والے افتخار احمد کی 24 گیندوں پر 60 رنز کی جارحانہ اننگز رائیگاں ہوگئی تھی۔
? The @IftiAhmed221 and @iFaheemAshraf show gets the Lahore crowd buzzing! ?#PAKvNZ | #CricketMubarak pic.twitter.com/10bEF5p9oP
— Pakistan Cricket (@TheRealPCB) April 17, 2023
شاہد آفریدی نے ان کی جارحانہ اننگز پر سوشل میڈیا پر بیان دیتے ہوئے کہا کہ’ افتخار آپ میرے لیے چاچا نہیں، بلکہ بوم بوم ہو، میری خواہش تھی کہ آپ میچ کو جیت کے ساتھ ختم کرتے تو آپ کی اننگز یادگار ہوجاتی’۔
شاہد آفریدی نے کہا کہ’ مجموعی طور پر زبردست مقابلہ ہوا، شائقین بہت لطف اندوز ہوئے، نیوزی لینڈ کرکٹ ٹیم کا پاکستان کا دورہ کرنے پر شکریہ’۔
You are not chacha for me @IftiAhmed221 you are boom boom but I wish that you had finished the match and make yourselves a memorable inning. Overall well played, it was good cricket over all, the fans enjoyed. Well done @TheRealPCB and thank you for coming @BLACKCAPS to ??
— Shahid Afridi (@SAfridiOfficial) April 17, 2023
افتخار احمد کی نیوزی لینڈ سے شکست پر قوم سے معذرت
پاکستان کرکٹ ٹیم کے مڈل آرڈر بلے باز افتخار احمد نے نیوزی لینڈ سے شکست پر قوم سے معافی مانگ لی۔
نیوزی لینڈ کے خلاف تیسرے ٹی 20 میں پاکستان کو جیت کے قریب لانے والے افتخار احمد کا کہنا تھا کہ میں سب پاکستانیوں سے معذرت کرتا ہوں، بہت کوشش کی، میچ نہ جیتنے کا بہت افسوس ہوا، ہم یہ میچ جیت سکتے تھے لیکن نہیں جیت سکے اس کے لیے معذرت خواہ ہیں۔
انہوں نے کہا کہ دائیں اور بائیں ہاتھ کے کمبی نیشن کی وجہ سے پلان کیا تھا اور اسی وجہ سے نمبر بھی تبدیل کیا گیا۔
افتخار احمد کا کہنا تھا کہ انٹرنیشنل کرکٹ میں پریشر تو ہمیشہ ہوتا ہے لیکن میں نے اور فہیم اشرف نے چیزوں کو سادہ رکھنے کی کوشش کی، ہم نے یہی پلان کیا ہوا تھا کہ ہم نے اوسط کو نہیں دیکھنا، صرف باؤنڈریز لگانا تھیں اور اسی سے ہم میچ جیت سکتے تھے۔
انہوں نے کہا کہ اگر آپ 16،15،14 کی اوسط کو دیکھتے ہیں تو پھر کام مشکل ہو جاتا ہے، جب ہم بیٹنگ کر رہے تھے وہ ایک مشکل وقت تھا، فہیم اشرف نے جب دو چھکے مارے تو اس وقت میں نے محسوس کیا کہ ہم جیت سکتے ہیں، جب اوسط زیادہ ہو تو پھر دونوں طرف سے رنز کرنا پڑتے ہیں بس بیڈ لک رہی کہ جیت نہ سکے۔
ان کا کہنا تھا کہ آخر میں جب نسیم شاہ میرے ساتھ تھے تو میرا یہی پلان تھا کہ اب میں نے ہی میچ ختم کرنا ہے، نسیم باؤلر ہیں اور بلے باز کو میچ فنش کرنا ہوتا ہے، باؤلر پر انحصار نہیں کر سکتے، پریشر میچز بیٹرز کے لیے ہوتے ہیں، بیٹر کھڑا ہو تو اس کو ذمہ داری لینا پڑتی ہے ، میں نے ذمہ داری لی اور شاٹ کھیلی۔
افتخار احمد نے مزید کہا کہ میدان میں لوگ جو آوازیں لگا رہے تھے یہ محبت ہے جس پر ہم خوش ہیں کیونکہ ہم لوگوں کی خوشی کے لیے کھیل رہے ہیں، میں نے کبھی نہیں سوچا کہ اسٹیڈیم میں مجھے کیوں آوازیں لگائی جاتی ہیں، جس نام سے پکارا جاتا ہے اس سے مجھے کچھ محسوس نہیں ہوتا میں خود بھی انجوائے کرتا ہوں۔
.@IftiAhmed221 and @iFaheemAshraf talk about their blistering stand in the third T20I and look ahead to the remaining two matches in Rawalpindi.#PAKvNZ | #CricketMubarak pic.twitter.com/HwLHAgI6S3
— Pakistan Cricket (@TheRealPCB) April 17, 2023
افتخار احمد نے مزید کہا کہ بابر اعظم اور محمد رضوان اوپر سے رنز کر رہے ہیں وہ جلد آؤٹ ہوگئے تو پھر مشکل ہو گئی، میچ نیوزی لینڈ کی طرف جا رہا تھا لیکن پھر بھی ہم نے کوشش کی، جیت سکتے تھے مگر ممکن نہ ہو سکا۔
انہوں نے کہا کہ جس طرح کا ہمارا کمبی نیشن ہے ہم سیریز جیت جائیں گے، ہمارے باؤلرز اور بیٹرز فارم میں ہیں، مشکل نہیں ہو گی، ہم جیت جائیں گے۔
