کاغذات نامزدگی منظور یا مسترد کیے جانے کے خلاف اپیلیں دائر کرنے کا مرحلہ مکمل

عام انتخابات 2024 کے لیے ریٹرننگ افسران کی جانب سے امیدواروں کے کاغذات نامزدگی منظور یا مسترد کیے جانے کے خلاف اپیلیں دائر کرنے کا مرحلہ مکمل ہوگیا۔

’ڈان نیوز‘ کے مطابق لاہور ہائی کورٹ کے ایپلیٹ ٹریبونلز میں مجموعی طور پر 624 اپیلیں دائر ہوئیں۔

اِن میں سے 609 اپیلیں آر اوز کی جانب سے کاغذات نامزدگی مسترد کرنے کے خلاف دائر ہوئیں جبکہ 15 اپیلیں ریٹرننگ افسران کی جانب سے کاغذات نامزدگی منظور کرنے کے خلاف دائر ہوئیں۔

بہاولپور بینچ کے ٹریبونل میں 81 اپیلیں دائر ہوئیں، ملتان بینچ کے ایپلیٹ ٹریبونل میں 219 اپیلیں دائر ہوئیں، راولپنڈی بینچ کے ٹریبونل میں 164 اپیلیں دائر ہوئیں۔

واضح رہے کہ ایپلیٹ ٹریبونلز 10 جنوری تک اپیلوں پر فیصلے سنائیں گے۔