لاہور ہائی کورٹ نے منہاج القرآن کی رجسٹریشن کی منسوخی روک دی

Lahore Highcourtلاہور ہائی کورٹ نے ادارہ منہاج القرآن کی رجسٹریشن کی منسوخی روکتے ہوئے پنجاب حکومت اور رجسٹرار جوائنٹ اسٹاک کمپنیز سے رپورٹ طلب کرلی ہے۔
منہاج القرآن کی رجسٹریشن منسوخی کے خلاف درخواست کی سماعت کے دوران ادارہ منہاج القرآن کی جانب سے موقف اختیار کیا گیا کہ  پنجاب حکومت ادارہ منہاج القرآن کے عہدیداروں کو سیاسی انتقام کا نشانہ بنا رہی ہے، رجسٹرار جوائنٹ اسٹاک کمپنیز نے بلٹ پروف گاڑی اور کنٹینر کی خریداری کے سلسلے میں تحریری جواب داخل کرانے کے باوجود ادارے کی رجسٹریشن منسوخ کرنے کا نوٹس جاری کیا جو کہ کسی بھی طرح درست نہیں، اس لئے رجسٹریشن منسوخی کا نوٹس کالعدم کیا جائے۔ عدالت عالیہ نے ادارہ منہاج القرآن کا موقف سننے کے بعد رجسٹریشن کی منسوخی روکتے ہوئے پنجاب حکومت اور رجسٹرار جوائنٹ اسٹاک کمپنیز سے 2 ہفتوں میں رپورٹ طلب کرلی ہے۔
واضح رہے کہ 20 دسمبر 2014 کو رجسٹرار جوائنٹ اسٹاک کمپنیز کی جانب سے ادارہ منہاج القرآن کی رجسٹریشن منسوخ کرنے کا نوٹس بھجوایا گیا تھا جس میں الزام عائد کیا گیا تھا کہ ادارے نےغیرقانونی طورپربلٹ پروف گاڑیاں اور کنٹینر خریدے اور اپنی آڈٹ رپورٹ میں بلٹ پروف گاڑیوں اور کنٹینرز کی خریداری ظاہر نہیں کی گئی۔

اپنی رائے کا اظہار کریں

Your email address will not be published. Required fields are marked *