آسٹریلیا: سب سے زیادہ کیک کھانے کے مقابلے میں خاتون ہلاک

آسٹریلیا میں سب سے زیادہ لیمنگٹن کیک کھانے کے مقابلے میں حصہ لیتے ہوئے ایک خاتون دم توڑ گئیں۔

اتوار کو کوئینز لینڈ کے شہر ہاروی بے کے ہوٹل میں ایک ایونٹ کے دوران 60 سالہ خاتون کو اس وقت دل کا دورہ پڑا جب وہ آسٹریلیا کے قومی دن کی تقریبات میں حصہ لے رہی تھیں۔

مقابلے میں حصہ لینے والوں کی لیمنگٹن کیک کھاتے ہوئے فلم بندی بھی کی گئی۔

لیمنگٹن ایک روایتی اسفنج کیک ہے جو چاکلیٹ اور خشک ناریل کو ملا کر بنایا جاتا ہے۔

خاتون کو جائے وقوعہ پر سی پی آر دیا گیا تھا اور بعد میں اسپتال لے جایا گیا لیکن بعد میں وہ دم توڑ گئیں۔

عینی شاہدین کے مطابق جب ان کی طبعیت خراب ہوتی دکھائی دی ان کا منھ کیک سے بھرا ہوا تھا۔

سامنے آنے والی فوٹیج میں دیکھا جا سکتا ہے کہ حادثے سے قبل شراب خانے کے سرپرست ایسے لوگوں کی حوصلہ افزائی کر رہے ہیں جنھوں نے کیک کھاتے ہوئے اپنے ساتھ پانی کے گلاس رکھے ہوئے ہیں۔

کیک
آسٹریلیا کے قومی دن کے موقع پر ملک بھر میں چھٹی ہوتی ہے اور کھانے کے مقابلے منعقد کیے جاتے ہیں

ہاروی بے میں واقع بیچ ہاؤس ہوٹل نے فیس بک پر ایک پیغام پوسٹ کیا جس میں اس خاتون (جن کی شناخت ابھی تک ظاہر نہیں کی گئی ہے) کے لواحقین اور دوستوں سے اظہار تعزیت کیا گیا ہے۔

انھوں نے ’فوری اور پیشہ ورانہ مدد‘ فراہم کر نے پر ایمبولینس سروس کا بھی شکریہ ادا کیا۔

آسٹریلیا کے قومی دن کے موقع پر ملک بھر میں چھٹی ہوتی ہے اور کھانے کے مقابلے منعقد کیے جاتے ہیں جو خاصا مقبول کھیل ہیں۔ یہ وہ دن ہے جب پہلے یورپی باشندوں کی آسٹریلیا آمد ہوئی تھی۔

مقابلے میں حصہ لینے والوں کو محدود وقت میں زیادہ سے زیادہ کیک، پائی، ہاٹ ڈاگ یا دیگر کھانا کھانے پر انعامات دیے جاتے ہیں۔

اپنی رائے کا اظہار کریں

Your email address will not be published. Required fields are marked *

error: